سيكلي ياسيكلي لا نظيف ولا مخيس

بسم الله الرحمن الرحيم
السلام عليكم ورحمة الله وبركاته

سيكلي ياسيكلي لا نظيف ولا مخيس ... ودني لمعاك ياهلال نبغى نحوس
ياجلمبو هات لي قحْشة من القراطيس ... لو كيسة اسمنت أهم شيَّ نكتب به إهجوس
ياجلمبو خل أفضفض لك من الهواجيس ... أنا من عرفتها وأنا بالحيل محيوس
كنت فاتح بلوتوث قلبي بالدواعيس ... دواعيس منفوحة وارسلت لي هي فيروس
فيروسها فرمت القلب بأسرع من إبليس ... إلين وندوز فؤادي صار متروس سوس
واليوم ياصاحبي صرت ضمن الملاحيس ... لاجيت أفكر ادخل على عقلي من الدوس



صباحكم ورد وعسل ، صباحكم فل وياسمين وكل الزهور الي يجيبها فصل الربيع ، صباحكم بسكوت أولكر مغطوط بكاس
شاهي زنجبيل بعز البرد .

أووووه يااااااااعاااالم ... اليوم ذا يوم موب عادي أبد .. يوم يسجل بالتاريخ .. اليوم ذا مثل مذنب هالي مايجي الا كل 76 سنة .. في ذا اليوم حصل شي لايمكن يمر الا مرة بالقرن .. في ذا اليوم تحركت مشاعر وأحاسيس الدكتور جنط السفينة وفاض منسوب المشاعر عنده .. والظاهرة ذي لايمكن تكرر إلا نادراً وأحمدوا ربكم إن اليوم ذا جاء وأنتم حيين .

لأن الأطباء كلهم أجمعوا إن الدكتور جنط عنده نقص حاد بالمشاعر وإن ضميره ميّت بس الحمد لله إن ضميري صحا اليوم ولا بد أن أستغل هالفرصة وأعبر عن أحاسيسي ومشاعري تجاه سكان كوكب الكورة الأرضية<< ساقط بالتعبير.

و (جلمبو) المذكور في القصيدة الي راحت هو صديقي ورفيق دربي وحبيبي (أبوجلمبو) الحاصل على جائزة نوبل للهسترة ، وهذا أبوجلمبو هو أخبل إنسان على مر العصور والدهور حتى أنه هو لي قال فيه أرسطو مقولته المشهورة : (لوكانت الهسترةُ رجلاً لكان أباجلمبو) ، وأبوجلمبو بالنسبة لي مثل ثاني أكسيد الكربون لايمكن أستغني عنه ، حتى إنه مرة غاب عني كم يوم فكتبت قصيدتي المشهورة الي رواها عني الأصمعي الي أقول في مطلعها :

حبك الفطري يقرقع في فؤادي ... مثل قوطي طايحن وسطه حصاه
وبهالمناسبة أهدي هذا التصميم لحشاشة جوفي أبوجلمبو :

[img][/img]

المهم موب ذا موضوعنا .. موضوعنا إني يوم شفت الشاعر الأسطوري الكبير ناصر بن فارس الفراعنة في شاعر المليون تذكرت موضوع كتبته في تاريخ (10/1/2007) يعني قبل سنة وست أيام وكان عنوانه (شاعر الخمسمية)، ويوم شفت الشاعر الكبير ناصر -الي أتمنى إنه يرفع البيرق وهو يستاهل - تذكرت الموضوع وحبيت أعرضه لكم ، لكن قبل ندرعم بالموضوع فيه ملاحظتين :
1- جميع الأسماء الموجودة في الموضوع هم أعضاء في منتدى أكتب فيه.
2- أقدم شكر خاص للأخ (منير أكبر خان)الي صمم لنا شعار البرنامج .
يالله اجلسو بجنب بعض وطفوا اللمبات وجيبوا الفشار بس نصيحة لا أحد يجلس بجنب بعض ناس تراهم مدودين .

*****

والآن مع البرنامج وننقل المايك الي مقدم البرنامج المبدع أبوهتون ومقدمة البرنامج المبدعة مون :

[img][/img]

دوووولوووووم دوووووولوووووم << موسيقى البرنامج

[img][/img]

المقدم المبدع أبوهتون

[img][/img]

النجمة المبدعة مون

تااااااابع

أبوهتون : حياكم الله ياجمهور مسرح ساقي الواحة في هذه الحلقة الي ننقلها لكم على الهواء مباشرة مع برنامج الكبير شاعررررر الخمسميييييية .
مون : والآن خلونا نرحب بضيفتنا لهذه الليلة مع صاحبة الصوت الندي والوجه البهي الطقاقة عفواً الفنانة
الشعبية المهرة .. نتركم مع أعذب الالحان وأندى الأصوات .. المايك معتس يامهرتنا

[img][/img]


المهرة تاخذ المايك وتمشي شوي بعدين يبدن الطيران بالطق وتبدا تغني :
امباركين عرس الاثنين
ليلة ربيع عينه قمرا

طنطقا طنطقا
طنطقا طنطقا

بعد خمس دقايق تاخذ مون المايك وتقول يسد أدوختينا وحومتي تسبودنا
مون : خلون الآن نرحب بلجنة التحكيم :

الأستاذ كاتم الونة :
[img][/img]
والأستاذ زعبور:
[img][/img]
والدكتور علشان (علوووش) :
[img][/img]
حياكم الله يا لجنة التحكيم << كلهم يقزون مون
وفجأة يسمعون أصوات ويوقفون شوي إلا يدخل سمو الأمير أبوشدق الدبتسي ويحيي الجمهور هو والشلة الي
معه ويجلسون
أبوهتون : حيا الله سمو الأمير ، والآن خلونا نتعرف على متسابقنا الأول لهذه الليلة من الخبوب الشاعر :
(فتى القصيعة أبو نديم الخبوبي )
[img][/img]
فتى القصيعة

بعدين تطلع الكاميرا وسط مزرعه وأبونديم واقف ولافن ثوبه على وسطه
أبونديم : أخوكم أبونديم الخبوبي معروف بالساحة الشعبية باسم فتى القصيعة ، بدأت كتابة الشعر قبل نقلع
النخله المكتومية القصيا هوايتي اسقاي النخل والجلوس بالقرب من التزت(القت) ومشاهدة مصارعة الثيران
اذا حصلت على الخمسمية أبفجر السادزي(الساقي) الي من دزبلة(قبلة) وأبوسعه عشان نبي نوسع حوض التزت لأن
طول الله عماركم أبوي يقول إنه يبي ...
أبوهتون : نكتفي بهذا القدر والآن رحبوا بالشاعر فتى القصيعة.
يدخل أبونديم يمشي بسرعة ويجلس على الكرسي
أبونديم : مساكم الله بالخير ومساك الله بالخير ياطويل العمر ويشرفن إني ألقي قصيدة قدام سموكم
مشاركتي بعنوان ( كيسين تزت ):

سلام يا أهل النخـل والبساتين ××× وأخـص الـي سكـن بالـخبـوبي
الجادل الي عمرها فوق خمسين ××× ولو إنها شينة بس معها أذوبي
أحلى من السكري وكوسة الصين ××× وحليبٍ من بقرة الجطيلي محلوبي
لاشفتها تمشي بوسط البساتين ××× أتلـخبـط وأضيّـع جميـع الـدروبي
لاصرت أبي دزبلة أروح ليمين ××× ولاصرت أبي شمال أروح الجنوبي
أحبـهـا حـب الـعـرب للبـعارين ××× وأنا بالحب صادق ماني تسذوبي
ياحنفي جب لي من التزت كيسين ××× خلن افضفض لك لاغاب محبوبي

وسلامتكم

أبوهتون : الرأي الآن للجنة مع الاستاذ زعبور.
زعبور : شكرا يالدودة (معيارة أبوهتون) ، وأنت يا أبونديم مسوي لي راعي حب أنت ووجهك قصيدتك زينة بس لا عاد تعودها
مرتن ثانيه والآن الرأي للدكتور علشان .
د.علشان : القصيدة جزلة وعميقة وهي قصيدة مدفونة وأنا أقول إن الشاعر استخدم حب المرأة هنا للتعبير
عن حب المزرعة وشكراً .
الكاتم : صح الله لسانك يا أبونديم القصيدة جميلة ولكن عندي ملاحظتين الأولى وش عرفك إن كوسة الصين حالية ؟
والثانيه ليش تكرر كلمة البساتين في القصيدة مرتين.
أبونديم : بالنسبة للكوسة أجعلي أموت إني ذايقه ، تخبر الكوسة عندنا هالأيام ما أحدن يقدر يشتريه من غليه
وبدينا نستورد الكوسة من الصين وبالنسبة لتكرير تسلمة البساتين فبكيفي القصيدة قصيدتي أمبغى أخلي القافية
كله وحدة وش محرقن رزك أنت ؟ .. وقبل ما أروح لديوانية الترفيهي عندي تسلمة أبقوله وهي ليش أبوسع حوض
التزت لأن أبوي يقول إنه يبي يشتري بقر كثار ونحتاج إننا نزيد إنتاج التزت عشان تسذا أرجو منكم تصوتون لي .

تاااااااااااابع

تااااااااااااابع
مون : تفضل يا أبونديم للديوانية والآن خلونا نتعرف على فارسنا الثاني هذه الليلة من بوركينافاسو الشاعر
(د. جنط السفينة)


[img][/img]
الجنط

تطلع الكاميرا على عشرين عشة بجنب بعض وبه واحد شبهه واقف تقرب له الكاميرا
د.جنط السفينة : أخوكم د.جنط السفينة بديت كتابة الشعر أول ماطحت بالتتن هواياتي السفر والسياحة وترويج
المخدرات في وقت الفراغ إذا حصلت على الخمسمية أبهديها لصديق العمر علي أبورجل مسلوخة فك الله
أسره << المقلع مسجون بقضية سرقة سيارات
وأقول لشباب منفوحة والشميسي لا تتركون رفيدزكم الله الله بالتصويت.
مون : والان رحبوا بشاعرنا الدكتور جنط السفينة من بوركينافاسو .
يدخل الجنط يمشي ويجلس على الكرسي
الجنط : مساكم الله بالخير جميعاً
مشاركتي بعنوان ( مي اليعملي ) :

صوت صفير الدخلي ××× ذكرن بمي اليعملي
ياويل تسبدك يالجنيط ××× لاذكرت أيام من اولي
يــوم إنـنـا بـزارين ××× تجـي مـع أهله لاهلي
وأنا اقــز أبــوها ××× عليها ثـوبـن مخملي
والهيلهوب مشقوقي ××× مع الركبة والأرجلي
وأنا أتميلح عندها ××× أجي أفحط بالسيكلي
وهي تناظرن وتضحك ××× وخدوده مثل الجلي
ويومن صارت تغطى ××× عجزت أنا أتحملي
بديت أمرمر بيتهم ××× يمكن إنه تويدز علي
ومرة واقت بالشتاء ××× لقتن واقف والمطر يهطلي
قالت لي وش طاعونك ××× واقفن بذا يامعصقلي
ناه ناه وش لا بس ××× ثـوبـن رهيـف ياااااويللي
رح يابعد تسبدي لبيتكم ××× والله الله بالتدحملي
ولامن كبرنا تعال اخطبن ××× اعرس علي بالمستقبلي
قلت أبشري ياميومه ××× هـمـن اخـذتس لمـنزلي
ولما هالحين وأنا ادابتس ××× وياروحي يامي اليعملي

وسلامتكم

مون : والآن الراي للجنة مع الاستاذ كاتم الونة.
الكاتم : صح لسانك يالجنط قصيدة ماعليها كلام أحسن قصيدة سمعته بحياتي والآن مع الدكتور.
د.علشان : أريد من الشاعر أن يشرح لي معنى كلمة (الدخلي) وكذلك البيت الذي تقول فيه :
ناه ناه وش لابس ××× ثوبن رهيف ياويللي
الجنط : الدخل نوع من أنواع الطيور أما البيت (ناه ناه ) معناها شوفوا بس بتعجب أكثر لأنه هي يوم شافتن
واقفن بالبرد وعلي ثوب رهيف قالت شوفوا وش لابس و (ياويللي ) معناه ياولي ويلاه فهمت والا أقوم أجلدك.
د.علشان : نعم فهمت وشكراً والآن مع الاستاذ زعبور.
زعبور : قصيدة منتازة ولو بيدي تسان عطيتك الخمسمية من هالحين.

مون : شكراً لك يالجنط وشكراً للجنة والان تقدر تتفضل للديوانية شف أبونديم مسوين حليب بالزنجبيل والآن.
حضورنا الكريم خلونا نتعرف على متسابقتنا الثالثة لهذه الليلة وهي الشاعرة الوحيدة الي تمثل السحالي ... من منفوحه
وخراباتها القديمة الشاعرة (نوور) :

[img][/img]
نوور

تطلع الكاميرا على حي شعبي قديم وبوسط شارع ضيق من شوارع هالحي فيه عبدة واقفة وبجنبها بزر عبد عمره
ثلاث سنين عليه فنيلة صفرا بدون سروال .. تقرب الكاميرا
نوور : معكم أختكم الشاعرة نوور أكتب قصايد للطقاقات بدأت كتابة الشعر من يومني بالمتوسط إذا فزت
بالخمسميه أبشتري كريم أساس من عطار المدينه عشان عرس هايدي (عضوة معنا)بالصيفية .. صوتولي تكفون.
مون :الآن رحبوا بالشاعرة نوور من منفوحة .
تدخل نوور وتجلس على الكرسي
نوور :السلام عليكم وأسمحوا لي أرحب بالطقاقة الكبيرة المهرة الي تعاونت معها بكم عمل فني وعلى فكرة
ترى عندي قصايد جديدة تسان تبين منهن تخبرين الصيفية قربت
المهم مشاركتي بعنوان ( بخ ) وهي في بنات المنتدى:

قبل القصيدة خل أبقول بخ ××× وأدري تحبوني من كل الأعماق
صح إني شينة وناقصة مخ ××× بس ترى أهم حاجة الأخلاق
أحب أنا مهرة ولو إنها كخ ××× والعنز أحبه ولها بالحيل أشتاق
ولخد دبدوبة ودي أمطخ ××× وبنت المضارع لها القلب صفاق
أحبكم كلكم آهـ بس وخ ××× وبشعري ودي أرضي كل الأذواق

وسلامتكم

مون : والآن نسمع راي اللجنة مع الدكتور علشان.
د.علشان : قصيدة جيدة وتشكر الشاعرة عليها ... معك يا أستاذ زعبور.
زعبور : زين الي الكديش طلع منهن شي .. القصيدة زوينة وفالك التوفيق ... كاتم.
الكاتم : قصيدة جيدة بس أنا أشوف إن القافية أجبرت الشاعرة على التقديم والتأخير في البيت الأخير حيث
قالت (بس وخ ) والعادة إنها تقال تسذا (وخ بس) عموماً القصيدة جيدة .
مون : يالله تقدرين تتفضلين في الديوانية

تااااابع
أبوهتون : والان خلونا نتعرف على المشترك الجديد معنا من جدة الشاعر قرقيز
[img][/img]
قرقيز

تطلع الكاميرا على عرابجى جالسين عند بقالة وبجنبهم كابرس تسع وسبعين مكتوب (الطائف )على القزازة
الي ورى وواحد جالس على شنطة الكابرس تقرب له الكاميرا
قرقيز : معكم أخوكم الشاعر قرقيز بدأت كتابة الشعر يومني بالسجن يومن يمسكوني وأنا أسرق من بقالة الحارة
هوايتي الدوران بالشوارع والجلوس عند البقالات إذا فزت بالخمسمية أبغيم فيها الكابرس .
ابوهتون : رحبوا معي بالشاعر قرقيز من جدة
يدخل قرقيز وهو يضحك ويجلس على الكرسي
قرقيز : مرحبن بكم يابشكة ، ومشاركتي بعنوان ( فك البكت ):

فك البكت و ارمي لي زقاره ××× خل ابتتن وابطرب الراس
وشغل المسجل أبغى اثاره ×××طخخخخخخخخخ مع الجبهة << كاس مويه رماه زعبور

زعبور : قم اندزلع دزلعك الله يالسرسري يا دزليل الحيا.
قرقيز : اشبك ياواااد ...انتا انقلع بلى بشكلك .
مير يعصب زعبور ويطلع خشبة من تحت الطاولة ويقوم ركض للمنصة الي به قرقيز ويقومون يلحقونه ويجي
أبوهتون ويمسك زعبور ويتجمعون عليه لجنة التحكيم وبعض الجمهور وياخذون الخشبة منه ويصيرون بينه
وبين قرقيز
مون : أعزائي المشاهدين فاصل قصير ونعود لكم
بعد الفاصل .
أبوهتون (وجهه أحمر) : خلونا نتعرف على متسابقنا الأخير لهذه الحلقة من حي السلام سواح الحكيم :
[img][/img

سواح متحمس << يسمع بالالقاء

تطلع الكاميرا علي بيت لونه أبيض يفتح الباب واحد مرسم تقرب له الكاميرا
سواح : أخوكم الشاعر سواح أكتب الشعر منذ نعومة أظفاري هواياتي الصيد والقراءة اذا حصلت على
الخمسمية أبشتري فيها أم صتمة لأخوي الصغير .
أبوهتون : رحبوا معي بالشاعر سواح الحكيم من حي السلام
يدخل سواح يمشي بهدوء ويجلس على الكرسي
سواح : مساكم الله بالخير وكيف حالك ياطويل العمر يشرفني والله حضوري بينكم اليوم ومشاركتي بعنوان
(التواقيع):

يـاناس أنا مـا أحـب الـعـداوات ××× لـكـن يغـثوني بعـض السـرابيت
يالله اسمعـوا نصحي بالأبيات ××× وقـصـيدتي كلـها بس كـم بـيـت
يا أهل التـواقيـع الـي فيها بنات ××× تحـط صـورة وللمسلمـين آذيـت
تجمع ذنوب الناس من كل الاشتات ××× ماسمعت الي يقول استتر اذا بليت
وصلوا على المختار في كل الاوقات ××× الهادي الي طاف في داخل البيت

وسلامتكم

ابوهتون : والآن نستمع لرأي اللجنه مع الاستاذ الكاتم.
الكاتم : قصيدة رائعة ومعانيها سامية وأتمنى من الأعضاء إنهم ينتبهون لهالشي يعني مالها داعي تتحمل
ذنوب الناس أشكر الشاعر وانتقل الآن للاستاذ زعبور.
زعبور (زراراته متقطعة): وخّر أنت وإياه<< بنفس شينة
د.علشان : قصيدة جزلة ومعانيها راقية يشكر الشاعر عليها.
أبوهتون : الآن تقدر تتفضل للديوانيه ياسواح.
مون : متابعين في كل متسان هالحين جاء دور اللجنة للاعلان عن الفايز بهالمسابقه والآن مع الدكتور علشان
ليعلن عن النتيجة :

د.علشان : بعد اجتماع اللجنة والمشاورات قررت اللجنه ترك الترشيح مفتوح للجمهور بمعنى إنه يمكنكم
الترشيح في الاستفتاء المطروح على الشاشه وشكراً .

ابوهتون : إذن عزيزي المتابع يمكنك الآن ترشيح الشاعر الذي ترى إنه يستحق الفوز وذلك من خلال
الاستفتاء و في الحلقه القادمة سنعلن عن الفائز وسيشرفنا سمو الأمير ابوشدز الدبتسي وسيسلم الجائزة
بنفسه وفي الختام نترككم مع أعذب الألحان مع مطربتنا الكبيرة المهرة

تقوم المهرة معها المايك:

يالا لالا لاه
كل العبيد خياله
يالا لالا.....
مايدرون إلا الي يرقى المنصة ركض معه خشبة ومايمديهم يمسكونه وبالخشبة مع جبهة المهره الا الدمامين
بكل متسان ويوم قربوا الكاميرا على وجهه الاه زعبور .
ابوهتون ( وجهه أحمر ) : أعزائي المشاهدين مايحتاج نكمل لكم الاغنيه أصلاً الأغاني حرام نلتقي
في الحلقة القادمة .

******************

خلاص انتهى الموضوع
دمتم بأحلى ابتسامة
أحسن واحد بالعالم
د.ابو سامي]